కరువుపై యుద్ధం..మిషన్ కాకతీయ

ఉద్యమంగా చెరువుల పునరుద్ధరణ       టీజేఏసీ ‘ఇంటరాక్షన్’లో మంత్రి హరీశ్‌రావు      తెలంగాణ పునర్నిర్మాణానికి ఆయువు పట్టు:కోదండరాం     ...

ఉద్యమంగా చెరువుల పునరుద్ధరణ

•      టీజేఏసీ ‘ఇంటరాక్షన్’లో మంత్రి హరీశ్‌రావు
•      తెలంగాణ పునర్నిర్మాణానికి ఆయువు పట్టు:కోదండరాం
•      50 లక్షల విరాళం ప్రకటించిన అడ్వొకేట్స్ జేఏసీ చైర్మన్ రాజేందర్ రెడ్డి

 హైదరాబాద్: ‘తెలంగాణ ఉద్యమం జరిగిందే నీళ్లు-నిధులు-నియామకాల కోసం. తెలంగాణ రాష్ర్టం ఏర్పడితే చెరువులు బాగుపడుతాయని ఉద్యమ కాలంలో ప్రజలకు చెప్పాం. సీఎం కేసీఆర్ చేపట్టిన ముఖ్య కార్యక్రమాల్లో మిషన్ కాకతీయ ఒకటి. చెరువుల పునరుద్ధరణ అంటే కేవలం కాంట్రాక్టు పనిగా కాకుండా, ప్రజా ఉద్యమంగా భావిస్తున్నాం. చెరువుల పునరుద్ధరణ అంటే కరువుపై యుద్ధం. రైతుల ఆత్మహత్యలను నివారించడం. చెరువు ఒక సాంస్కృతిక కేంద్రం...’ అని భారీ నీటిపారుదల మంత్రి హరీశ్‌రావు అన్నారు. తెలంగాణ జేఏసీ ఆధ్వర్యంలో ఆదివారం హైదరాబాద్‌లో జరిగిన ‘మిషన్ కాకతీయ - పరస్పర చర్చ’  కార్యక్రమంలో మంత్రి పాల్గొన్నారు. ఈ సందర్భంగా మిషన్ కాకతీయలో భాగంగా చేపట్టనున్న చెరువుల పునరుద్ధరణ, ప్రభుత్వ కార్యాచరణ ప్రణాళికను వివరించారు. భారీ నీటిపారుదల ప్రాజెక్టులకు ప్రాధాన్యం ఇస్తూనే.. తక్షణం సాగునీరు అందించే చెరువుల పునరుద్ధరణపై దృష్టి పెట్టినట్లు చెప్పారు. గతంలో కార్యకర్తల కోసమే పనులు అన్నట్టుగా ఉండేవని, మిషన్ కాకతీయలో పైసా పని కూడా నామినేషన్ పద్ధతిన ఇవ్వలేదని స్పష్టం చేశారు. ఇప్పటికే మూడు వేల చెరువులకు టెండర్లు పూర్తయ్యాయన్నారు. బచావత్ అవార్డులోనే తెలంగాణ చెరువులకు 265 టీఎంసీల నీటి కేటాయింపులు ఉన్నాయని, దీనివల్ల 26 లక్షల ఎకరాల ఆయకట్టుకు సాగునీరు అందుతుందని వివరించారు. ‘పునర్నిర్మాణంలో కలసి పనిచేద్దాం. తప్పులు ఉంటే చెప్పండి. మంచి సూచనలు చేయండి. స్వీకరించడానికి సిద్ధం..’ అని మంత్రి టీజేఏసీకి విజ్ఞప్తి చేశారు.
 తెలంగాణ సమాజం ఏకం కావాలి
 మిషన్ కాకతీయను విజయవంతం చేయడానికి తెలంగాణ సమాజమంతా ఏకం కావాలని ప్రొఫెసర్ కోదండరాం  అన్నారు. హైదరాబాద్‌లో ఉంటే విదేశంలో ఉన్నట్టుంది అన్న చంద్రబాబు ఎంత త్వరగా ఇక్కడి నుంచి వెళ్లిపోతే... పాలన అంత సక్రమంగా సాగుతుందన్నారు. మిషన్ కాకతీయపై కరపత్రాలు, పోస్టర్ల ద్వారా ప్రచారం చేయాలని జిల్లా జేఏసీల నుంచి సూచనలు అందాయని, మరోసారి భేటీ అయి నిర్ణయం తీసుకుంటామన్నారు. టీఎన్జీవోల అధ్యక్షుడు దేవీప్రసాద్ మాట్లాడుతూ.. మిషన్ కాకతీయ గురించి ప్రజల్లో విస్తృతంగా ప్రచారం చేసేందుకు ఉద్యోగులు కృషి చేస్తారని చెప్పారు.  అడ్వొకేట్ జేఏసీ చైర్మన్ రాజేందర్‌రెడ్డి మిషన్ కాకతీయకు రూ.50 లక్షలు విరాళంగా ప్రకటించారు. ఈ మొత్తంలోరూ.25 లక్షలు వ్యక్తిగతంగా ఇవ్వనున్నట్లు ప్రకటించారు. తెలంగాణ ఉద్యోగ జేఏసీ తరఫున ఒకరోజు వేతనాన్ని విరాళంగా ప్రకటించారు. నీటిపారుదల శాఖ ఉద్యోగులు ఒక రోజు వేతనం ప్రకటించినట్లు చెప్పారు. తెలంగాణ ఫిల్మ్ జేఏసీ చైర్మన్ విజయేందర్‌రెడ్డి రూ.లక్ష విరాళంగా ప్రకటించి వేదికపైనే మంత్రి హరీశ్‌రావుకు చెక్కు అందించారు. చర్చల్లో పాల్గొన్న అన్ని జిల్లాల జేఏసీ చైర్మన్లు తమ జిల్లాలకు సంబంధించి సూచనలు చేశారు. కార్యక్రమంలో ఇంజనీర్ల జేఏసీ చైర్మన్ వెంకటేశ్వర్లు, హమీద్ మహ్మద్, పిట్టల రవీందర్ తదితరులు పాల్గొన్నారు.