ఫ్రాన్స్‌లో ఘోర విమాన ప్రమాదం

-150 మంది ప్రయాణికులు మృతి -ఆల్ఫ్స్ పర్వతాల్లో కూలిపోయిన జర్మనీ విమానం - 1400 మీటర్ల ఎత్తులో మంచు నదిలో శకలాలు - దిగ్భ్రాంతి వ్యక్తంచేసి...

-150 మంది ప్రయాణికులు మృతి
-ఆల్ఫ్స్ పర్వతాల్లో కూలిపోయిన జర్మనీ విమానం
- 1400 మీటర్ల ఎత్తులో మంచు నదిలో శకలాలు
- దిగ్భ్రాంతి వ్యక్తంచేసిన ఫ్రాన్స్, జర్మనీ దేశాధినేతలు
- మృతుల కుటుంబాలకు ప్రధాని మోదీ సంతాపం

ప్యారిస్, మార్చి 24: ఫ్రాన్స్‌లో మంగళవారం జరిగిన ఘోర విమాన ప్రమాదంలో దాదాపు 150 మంది ప్రయాణికులు మరణించారు. 144 మంది ప్రయాణికులు, ఆరుగురు సిబ్బందితో స్పెయిన్ తీరప్రాంత నగరం బార్సిలోనా నుంచి జర్మనీలోని డుస్సెల్‌డార్ఫ్‌కు బయలుదేరిన జర్మన్‌వింగ్స్ సంస్థకు చెందిన ఎయిర్‌బస్ ఏ320 విమానం ఫ్రాన్స్ భూభాగంలోని ఆల్ఫ్స్ పర్వత సానువుల్లో కూలిపోవటంతో ఈ దుర్ఘటన చోటుచేసుకుంది. విమానంలో జర్మనీ, స్పెయిన్, టర్కీ పౌరులు ప్రయాణిస్తున్నట్లు భావిస్తున్నారు.

ఈ ప్రమాదంపై ఫ్రాన్స్ అధ్యక్షుడు ఫ్రాంకోయిస్ హోలాండే, జర్మనీ చాన్స్‌లర్ ఎంజెలా మెర్కెల్‌తోపాటు భారత ప్రధాని నరేంద్రమోదీ తీవ్ర దిగ్భ్రాంతి వ్యక్తంచేశారు. ప్రమాద వార్త తెలియగానే స్పెయిన్‌రాజు ఫిలిప్-6 తన ఫ్రాన్స్ పర్యటనను రద్దుచేసుకున్నారు. మంచుతోకూడిన కొండలు, అడవులతో అత్యంత దుర్బేధ్యమైన ప్రాంతంలో విమానం కూలటంతో ప్రయాణికులెవరూ బతికి బట్టకట్టే అవకాశం లేదని ఫ్రాన్స్ రవాణాశాఖ సహాయమంత్రి అలియన్ విడాలిస్ తెలిపారు. ప్రమాదానికిగల కారణాలు ఇంకా తెలియరాలేదని ఫ్రాన్స్ ప్రధాని మాన్యుయెల్ బాల్స్ చెప్పారు. ఫ్రాన్స్‌లో గత నాలుగు దశాబ్దాల్లో ఇదే అతిపెద్ద విమాన ప్రమాదం.

1400 మీటర్ల ఎత్తులో ప్రమాదం

బార్సిలోనా నుంచి డుస్సెల్‌డార్ఫ్‌కు బయలుదేరిన 4యూ 9525 విమానంతో మంగళవారం ఉదయం 10.30 (స్థానిక కాలమానం) సమయంలో కంట్రోల్‌రూంకు సంబంధాలు తెగిపోయాయని జర్మన్‌వింగ్స్ సంస్థ అధికారులు తెలిపారు. ఆ సమయంలో విమానం 5000 అడుగుల ఎత్తులో ఎగురుతున్నదని వెల్లడించారు.

లుఫ్తాన్సా ఎయిర్‌లైన్స్‌కు చెందిన జర్మన్‌వింగ్ సంస్థ తక్కువ చార్జీలతో విమానాలు నడుపుతుంది. విమానం అదృశ్యమైన ప్రాంతంలో ఫ్రాన్స్ పోలీస్ హెలికాప్టర్లు గాలించగా విమాన శకలాలు కనిపించాయని, బార్సిలోనెట్టీలోని స్కీ రిసార్ట్ సమీపంలో ఆల్ఫ్స్ పర్వతసానువుల్లో దాదాపు 1400 మీటర్ల ఎత్తులో ఉన్న లెస్ ట్రాయిస్ మంచునదిలో విమానం కూలినట్లు గుర్తించామని ఫ్రాన్స్ అధ్యక్షుడు హోలాండే వెల్లడించారు. ఈ ప్రాంతం వాహనాలు వెళ్లటానికి వీలుకాని చోట ఉండటంతో వెంటనే సహాయ చర్యలు చేపట్టడం వీలుకావటంలేదని పేర్కొన్నారు. మంచుతో కూడిన ఎత్తైన పర్వతాలున్న ఈ ప్రాంతానికి కేవలం హెలికాప్టర్ల ద్వారా మాత్రమే చేరుకోవటానికి వీలుందని వివరించారు. మృతుల కుటుంబాలకు ఆయన ప్రగాఢ సంతాపం తెలిపారు. ఈ ప్రమాదం దురదృష్టకరమని భారత ప్రధాని మోదీ అన్నారు. ఆప్తులను కోల్పోయిన ప్రయాణికుల కుటుంబాల బాధను తాము కూడా పంచుకొంటున్నామని సంతాప సందేశంలో పేర్కొన్నారు.